یازدەیەمین خولی فێستیڤاڵی چیرۆکی بانە، کە بە دوو
زمانی کوردی و فارسی بۆ ماوەی سێ ڕۆژ و بە ئامادەبوونی نووسەرانی کورد و فارس لە شاری
بانە بەردەوام بوو، ئەمڕۆ پێنجشەممە بە خەڵاتکردنی سەرکەوتووان، کۆتایی پێهات.
لە فێستیڤاڵی چیرۆکی بانە 68 بەرهەمی چیرۆک بە دوو
زمانی کوردی و فارسی پێکەوە بۆ بەدەستهێنانی خەڵاتەکانی فێستیڤاڵ پێشبڕکێیان کرد، هاوکات
بەشێکی دیکەی فێستیڤاڵ بۆ ئەدەبی منداڵان و مێرمنداڵان تەرخان کرابوو.
لە بەشی چیرۆکی منداڵان و میرمنداڵاندا ئەم کەسانە
وەک سەرکەتوو ناسێندراون و خەڵات کران "هەستی یەونسی لە بانە، ڤیانا قزلجی، لە
بۆکان، ئاڵا ڕەزایی، لە بۆکان، زارا گوڵچینی، لە هەرسین، ئاریا عەجەمی، لە بۆکان و
شەهرزاد لەعل‌بەرزی".
لە بەشی وتاری فارسیی ئەدەبیاتی منداڵاندا
"محەمەدڕەزا کەلهوڕ و جەمیلە موعەزەمی" و لە بەشی وتاری کوردیشدا "عومەر
محەمەدی و مستەفا ئیلخانی‌زادە" خەڵاتیان وەرگرت.
لە بەشی چیرۆکی کوردیدا و فارسیدا ئەم کەسانە لەلایەن
داوەرانی فێستیڤاڵەوە بەبێ دیاریکردنی پلەبەندی خەڵات کران: "ئەفرا سەنایع، بە
بۆنەی تەکنیکی گێڕانەوە، غەفوور پیرزاد، بە بۆنەی تەکنیکی گێڕانەوە، مستەفا میرزایی،
بە بۆنەی خولقاندنی فەزای جیاواز، نادر ساعی‌وەر و مورتەزا بیاره به بۆنەی ڕەچاوکردنی
پێکهاتە و تەرحی داستان. هاوکات سروه مەجیدی، به بۆنەی خولقاندنی فەزای چیرۆک، کاوه
عیزەتخا و سابیر خالقی، به بۆنەی خولقاندنی کەسێتی و کیوومەرس بەلەده، به بۆنەی تەکنیکی
زمانی گێڕانەوە
لە بەشی زانستیی فێستیڤاڵدا هەشت وتار لەبارەی پێگە
و ڕەوتەکانی چیرۆکی کوردی و فارسی، هەروەها چیرۆکی منداڵان پێشکەش کران.
لە چەند پانێلی دیکەشدا حوسێن میدعابدینی لەبارەی
چیرۆکی ئێران و مراد ئەعزەمی و محەمەد ڕەحیمیان، دوو نووسەر و ڕەخنەگری کورد لەبارەی
بەرهەمەکانی ئیبراهیم یوونسی قسەیان کرد.
پانێلەکانی فێستیڤاڵ بۆ ڕیزلێنان لە پێگە و کەسایەتیی
ئەدییبە کۆچکردووەکان بەناوی "عەلی ئەشرەف دەرویشیان، ئیبراهیم یوونسی، خالید
خاکی و فەتحوڵا بی‌نیاز"ەوە تەرخان کرابوو.
لە بەشی کۆتایی فێستڤاڵدا ڕێز لە دوو نووسەری ناسراوی
کورد، فەتاح ئەمیری و مریەم قازی و حوسێن میدعابدینی نووسەری فارس گیرا خەڵاتی تایبەتییان
پێ بەخشرا.
هاوکات یەکێک لە داخوازییەکانی بەڕێوەبەران و لێژنەی
یازدەیەمین خولی فێستیڤاڵی بانە ئەوە بووە کە "نووسینگەی هەمیشەیی چیرۆکی بانە"
بکرێتەوە و هاوکات پێگەی فێستیڤاڵەکەش بکرێتە نێودەوڵەتی و بڕیار دراوە ساڵی داهاتوو
لە ئاستی نیدەوڵەتیدا بەڕێوە بچێت.
یەکێکی دیکە لە دەسکەوتەکانی فێستیڤاڵ، چاپ و بڵاوکردنەوەی
کتێبی "ئەزموونی گێرانەوە / تجربە روایت، کۆی بەرهەمە سەرکەوتووەکانی 10 خولی
پێشووی فێستیڤاڵ بووە کە لەلایەن وەشانگەی گوتار لە سەقز چاپ کراوە.
بە گوتەی
محه‌مه‌دسدیق که‌ریمپوور، به‌ڕێوه‌به‌ری ۱۱مین فێستیڤاڵی چیرۆکی
بانه له ماوه‌ی 10 خولی ڕابردوودا زیاتر له ۵ هه‌زار چیرۆک به ده‌ستی ده‌بیرخانه‌ی ئه‌م فێستیڤاڵه گه‌یشتووه که
به‌ڕاستی گه‌نجینه‌یه‌کی زۆر باشه و ده‌توانێت یارمه‌تیی ئه‌ده‌بی کوردی بدات.
که‌ریمپوور هه‌روه‌ها ئاماژه‌ی بەوەش داوە دا:
"ئێمه ئه‌مساڵ بۆ یه‌که‌م جار به‌شی منداڵانمان به فستیڤاڵه‌که‌ش زیاد کردووه
چون ئه‌ده‌بیاتی کوردی له‌م به‌شه‌دا زۆر لاوازه و کاری که‌مان کردووه و هیوادارین
بتوانین هه‌نگاوێکی باش بۆ ئه‌م به‌شه له ئه‌ده‌بیات هه‌ڵبگرین.
ئه‌و له کۆتایدا جه‌ختی کردەوە: فێستیڤاڵی چیرۆکی بانه باشترین ده‌رفه‌تی بۆ ئاشنایی
زیاتر له نێوان چیرۆکنووسانی کورد و فارس دروست کردووه و ده‌کرێ بنکه‌ی هاوبه‌شی
چیرۆکی کوردی و فارسی لە بانە ڕێک بخەین.
لە پەراوێزی یازدەیەمین خولی فێستیڤاڵی
بانەدا وێرای چەندین جاڵاکیی هونەری، هاوکات کۆڵانێک بەناوی "کتێب" و پارکێک
بەناوی "چیرۆک"ەوە ناودێر کران.
هیچ نظری موجود نیست:
ارسال یک نظر